આ પ્રેમ એ સાચી સાચી વાતો હશે?

આ પ્રેમ

એ મોટી મોટી વાતો હશે?

એ ખોટી ખોટી વાતો હશે?

‘તું મારો શરાબ ને ગુલાબના ફૂલ પર ઝાકળનો જામ’

એવો બધો લવારો હશે?

મિથ્યા વાણીનો દમામ હશે?

કોઈ કોઈને ચાહતું હશે?

કે

બીજાને ચાહવાથી

પોતાને જે સુખ મળે છે

એની કદાચ

કપોલકલ્પિત વાર્તા હશે?

અને

વાર્તા હશે

તો

વાર્તાનાં પાત્રો

કઠપૂતળીની જેમ નાચતાં હશે?

કોરી કોરી કિતાબનાં પાનાંને વાંચતાં હશે?

વાસનાને ઈશારે

આ બધું, આવું બધું ચાલતું હશે?

પાનખરનાં સૂકાં સૂકાં પાંદડાંઓ

હવા વિના પણ હાલ્યા કરે એમ

આ બધો પ્રેમનો તમાશો પણ ચાલ્યા કરતો હશે?

કોઈ કહોને,

આ પ્રેમ

એ સાચી સાચી વાતો હશે?

કે…?

–

panna nayak

Shared by Rushi Shah