ના આવે તો સારું,

રાત્રીના સ્વપ્નની યાદ સવારે ના આવે તો સારું,
તમારી આ ફરીયાદ અત્યારે ના આવે તો સારું..

ફૂલોનું અનુપમ સૌંદર્ય જોઇને મને થાય છે કે,
આ જીવનમાં પાનખર ના આવે તો સારું..

ડૂબી જવા માટે આ તોફાની દરિયામાં પડ્યો છું,
હવે આ શરીર કિનારે ના આવે તો સારું..
વેદનામાં તડપતો માનવી બોલી ઉઠે છે કે,
હવે કોઇ દિલાસો આપવા ના આવે તો સારું..

હ્રદયને રસ્તે હું જન્મ્યો હતો,ખબર છે તને ?
રુદનને બદલે હું મલક્યો હતો,ખબર છે તને ?
હું તારી લટને કિનારે જ આવીને અટક્યો
ક્ષિતિજના ઢાળથી લપસ્યો હતો,ખબર છે તને ?
બિચારા ઇવ કે આદમને કંઇ ખબર નહોતી
પ્રણય મેં શીખવ્યો હતો,ખબર છે તને ?
એ વર્ષોમા તો રચાઇ નહોતી ભાષા છતા,
હું બૂમ પાડીને બોલ્યો હતો,ખબર છે તને ?
સમયની શોધ થઈ તેની આગલી સાંજે
મે ઇંતેજારને શોધ્યો હતો,ખબર છે તને ?